Prins

 

 PRINS  2021

   PRINS SPOEËK d'n ieërste

   Heej onger kintj gae de oetroping en ut veurlaeze van de proclemasie door de prins zeen

 

YOUTUBE: oetroping en proclemasie Prins Spoeëk 1e                   FACEBOOK: oetroping en proclemasie Prins Spoeëk 1e

 

PROCLEMASIE

 

 Beste Spoeëkejaegers en Spoeëkejaegerinnen,

Ich, Prins Spoeëk de Ieërste,

Geboôre en getoôge in de Krang door un bevleeging van os Pap en eine zucht van os Mam zônger pien,

want ich kan mich in eedere bocht wringen dae ich wil.

Wie-j ich opgruûdje bin ich gevormdj door Harry van Nolle Wiel

en ich spoeëk al mien hieële laeve roôndj in de Krang.

Ich heb hieël völ breurs en zösters want os pap haaj nog al es unne kieër un bevleeging!

En eedere kieër waas ut raak. Mer name hebbe wae neet want wae liêke allemaol op-ein.

Mien breurs en zösters zeen allemaol oet-geweijtj nao anger streek,

mer ich bin altieëd in de Krang gebleeve.

Ich veul mich heej thoeës.

Veural in de wintjer en ut vreuge veurjaor, want dan is ut lekker mistig in de Krang en dan zeen de minse mich neet.

Dan kan ich ze lekker laote sjrikke as ich achter unne dikke boûm oet kom.

Ich bin neet getrouwdj mer vrie-j gezellig.

Ich heb waal völ wichter want in miene vreeje tiêd spoeëk ich van alles oet.

Eeder jaor kom ich weer ônger de minse as ut de elfdje van de elfdje is.

Dan loester ich good waat der allemaol gaondje is in ut dörp Swartbrook.

Veural op ut Kerkhof as ze staon te sjoefele, huur ich van alles.

En die anger spoeëke loestere dan met, zônger det de minse ut in de gate hebbe.

Leike dae ut ôngerhaod van ut bos deut, Jac dae de in- en oetgaondje stroum in de gate hèldj,

Ton dae veur de bieëste zörgdj in de Krang en waal ins wat verköptj aan un angere spoeëkefemiêlie,

Lei van Casper dae de optreijes verzörgdj van ozze eige boôntje aovundj in ut bos en Liba dae de maot aangeuftj.

En zoeë zeen wae met nog völ mieër spoeëke die allemaol eur eige taak hebbe.

Ein groeëte femiêlie zoeëj Sjaak van Luc zègge.

Same hebbe wae ut knap gezellig in ut Spoeëkebos.

Dit jaor is ut Corona Spoeëk opgedooke. Dao heb ich neet völ met op, want dae keumtj oet China.

Ich zoog ut al gelieëk aan det gaèle vel en die uig det der neet völ van doûgdje.

Dae heet de zaake heej aardig verstierdj, mer dae krieëge wae der waal ônger met alle spoeëke samen.

 

Ich Prins Spoeëk de Ieërste doon uch weete det,

Ten ieërste: Det ich Jan altiêd help met appeltaart bakke. Daorom is dae ouch zoeë lekker.

Tot-det der mich opgesloote haaj in de zaal. Gelökkig kos ich door ut sleutelgaat der oet!

Ten twieedje: Ich ut sjoeëm op ut beer bin; dich haps der-in, mer hebs niks in de moel.

Ich zörg altiêd det Jos goôt thoeës keumtj en haoj al jaore de moôre bee-j Lei Tinnemans recht!

Ten derdje: Ich zit altiêd op de veurste ree-j van de Boôntje Aovundj en lach ut haardst.

Mèr nemes huûrdj mich.

Auch haoj ich meistal un hendje oppe sjouwer van Henrie as der mot buutte.

Ten veerdje: Ich wei-j auch roôndj in de kerk bee-j de Vastelaovundjsmès en trek dan stiekem aan de bel as Judith ut neet zuût.

Ouch haoj ich der waal van om eemes van de Kapèl stiekum te kietele zoeë-det ze der naeve blaoze.

Ten viefdje: Ich heb noeëts meujte met de staèke van de Raod;

die passen altiê! Dikke of dun köp, ich pas mich zônger probleme aan.

Ten zesdje: Op de boôrebroeloft bin ich de derdje getuûge en haoj ich veural in de gate wat ze ’s -nachts nao de broeloft oet-vraète.

Daodoor keumtj der noeëts get van!

Ten zevendje: Op ut Spoeëkebal waas ut un echt spoeëkebal; eine lege zaal en spoeëkemuziek.

Ouch bee-j de zustervereiniginge waas niks te doon. Gein spoeëk gezeen!

Veur de optocht bin ich efkes op de wage bee-j Kemper gaon zitte, allein mer veur ut geveul.

’s- Aoves woôre de kuûj hieël oet de melk!

Ten achtste: Bie-j de Sjötterie doew ich aaf en toe tege de sjouwer aan, zoeë-det ze mis sjéete.

Ich haoj der waal van om wat te steuke!

Ten neugendje: Ich bin unne echte sporter. Bee-j ut voetballe probeer ich altiêd de bal tege te haoje, mer ze sjéete door mich haèr.

En bee-j ut biljaare bin ich dae witte bâl dae der noeëts in wiltj!

Ten tieendje: Bie-j de Loterie kiek ich welk belke der getrokke weurdj.

Soms verwissel ich ze snel zônger det eemes ut zuût

Ten elfdje: As ich verjaagtj waer op Vastelaovundj-dinsdig, mot ich altiêd un bitje bäöke; mèr dan zèg ich haard-op;

Kom op, volgendj jaor bin ich der weer!

 

En daorom gaon ich dit jaor veurop as Prins van de Spoeëkejaegers en heb ich de Orde ingesteldj van 

      

“Ut doorzichtig waemeske”

 

En det alles ônger mien devies:

 

Met dees daag as Spoeëk veurop,

Gaève wae Corona op ziene kop!

 

ALAAF