Prins

 

Prinsepaar 2017 Eric en Ingrid Derckx 

 

 

Proclamatie

 
Beste Spoeëkejaegers en Spoeëkejaegerinnen,

 Wae Prins Eric de Ieërste,        

 In Swartbrook gebore als zôon van Tjeu van Harrie van de Smeed en Dili van Sjeur Ties en Jessy van Coole-Herman en Kleuje-Nel en getrouwdj met Ingrid van Harrie van Trinkes Tinus en Truus van Maos Harrie heb ich al van jongs aaf aan groeëte dorst. Gelukkig haaje ôs pap en mam un café en heb ich noeëts dorst hoove lieje! Daorum bin ich auch zoeëne groeëte jong gewoore.

 Same hebbe wae 2 wichter: Rens van 16 jaor dae voetbal dinktj en laeftj en zich al mieër als eine kieër per wèek mot sjèire en Isa van 14 jaor die mich al veurgedaon heet wie det ze dich als Prins mos veurdoon. Auch ut gitaar speule heet ze van gein vreemdje, mèr det dansen van eur is neet mien ding. Ich haoj mieër van rocken! En dan bedoel ich neet die van de dames, mèr keijhaarde muziek!

 Wae woeëne aan de Coolenstraot en haoje met un sjuuns uigske de aoje sjool in de gate zodet dao niks áán keumtj. Wie ich dao op sjool zaat haaj ich al groeëtse plannen om aan de euverkantj te gaon bouwe mèr kwaam ich neet wiejer als de blokke-doeës. Mer good det ich doorgezatte heb en heb gelieërdj om mien eige buûnkes te doppe angers waas ich aangeweze op mien euver buurman dae samen mèt Chel de groeëtste mooshoof van Swartbrook heet!

Doon uch weten dèt;

 Ten ieërste: Dèt gae der lang op hebtj motte wachte, mèr det wae herstikke gruûts zeen det wae dit jaor veurop moge gaon biej de Spoeëkejaegers. Wae hebbe al un kieër geoefendj as boorebrôedspaar in 1991 mèr toen waas ich nog zoeë greun als moos. Noeë bin ich door de wol geverfdj en weit ich, bekans, woeë Abraham de mosterd haaltj!

 Ten twieëdje: Dèt, als ich volgendj jaor Abraham zeen, dan gaon ich aan mien twieëdje jeugd beginne en samen met Ingrid de route 66 rieje op miene Harley Davidson Streetglide. Rèkene waas noeëts mien sterkste kantj want wôerom zoeëts ze de route 66 rieje as ze van '68 bis?

 Ten derdje: Dèt ich hieël erg bevloge bin; Ich vleeg van hot nao her euver bekans de hieële wèreldj veur mien eige bedrieëf. Ich help bedrieëve mèt opstarte en daorum bin ich bliej det ich noeë Prins bin gewôore. Kan ich eindeluk de Vastelaovundj un kieër opstarte!

 Ten veerdje: Dèt ich gaer volop gaas gaef; neet allein mèt mien werk, mèr auch in de auto. Det is un echt race monster. Die Pruuse kinne der wat van, mèr det wist ich al van Klee. Det is auch zoeën sjeur-ieëzer!

 Ten viefdje: Dèt ich gaer gaon duiken. Meistal veur Ingrid, mèr soms auch ônger water samen met mien zwaoger en adjudant Hans en dochters Britt en Isa. Dao heb ich auch gelieërdj det un duikfles en un vrômmes vul opein lieëke; der zitj vul druk op en ze laupe zoeë leeg!

 Ten zesdje: Dèt ich hieëlemaol neet bang bin dèt de Raod mich áán-drinktj. Ich heb samen met un paar kammereûj un eige beerbrouwerie in Stèveswieërt woeë ich regelmaotig heb geoefendj veur de vastelaovundj. Daobiej drink ich auch nog es gaer un gooje schotse whisky. As Freek det mèr kan onthaoje!

 Ten zevendje: Dèt ich un echte voetbalgek bin. Neet allein speul ich biej de veterane, mèr heb ich samen met Rens un seizoenskaart biej PSV. Ut luktj neet altieëd om der biej te zeen en det zuus ze direct in de resultate! Ich zèg mer zoeë; Oost, west, PSV vak West best!

 Ten achtste: Dèt ich un hekel heb aan alles waat met ozze hoofdstad te make heet en dan bedoel ich neet Wieërt! Auch de naam van dae voetbalclub kan ich neet oetsprèke. Ich heb Ingrid zelfs verbooje ut wasmiddel van dèt merk te kaupe. Auch zal ich zeker neet aafsloeëte met det leedje van A.H.; "Het is weer tijd, de hoogste tijd". Ich gaon meistal als leste heivêrs!

 Ten neugendje: Dèt ich waal hieël vul van muziek haoj. Zingen en gitaar speulen zeen mien lust en mien laève. Samen met Jo en Hans in Zoat-Zeut en Zoor hebbe wae vul sjoeëne leedjes gezonge oppe Bôontje Aovundje. Wae zeen der allein nog steeds neet oet weem noeë dae zôore is.

 Ten tieëndje: Dèt ich goud ieërluk bin. Ich kan der neet tegen als eemes lûugtj.Daorum zèg ich auch hieël ieërluk det ich mich hieëj te burste zweit van spanning en dèt ich hieël bliej bin det wae der noeë eindeluk op los kinne fieëste samen met mien Prinses en adjudanten.

Ten elfdje: Dèt ich uch beloof der neet tusse oet te vleege veur Vastelaovundj Dinsdig en noeë gaas gaon gaeve in de polonaise!

 Daorom heb ich de Orde van de jetlag ingesteldj en gaon wae samen mèt alle Spoeëkejaegers dit jaor veurop ônger ôs devies:


 "Auto, vleegtûug, motor noeë effe neet,
Ieërst Vastelaovundj met Eric van de Smeed!"


 Alaaf!!