Vastelaovundj Legende
Net as alle dörpe di-j carnaval oftewaal vastelaovundj veere, heet auch Swartbrook zien eige vastelaovundj-legende.
De naam "De Spoeëkejaegers" pasj presies beej Swartbrook umdet ut törp grensj aan ut nateurgebied "De Krang". Van vreuger uut weare de umliggendje bosse auch waal ut Spoeëkebos geneumdj. Van huure zegge keumptj dit doordet dur ‘s nags spoeëke roondj dwaale. De legende verteltj os det veural in de weentjermaondje dur vul misterieuze dinger gebeure in en roontj ut Spoeëkebos.
Eeder jaor vanaaf 11 november mot eederein good uutkieke asse 's aovus nog door de Krang mot. De spoeëke di-j dao gaondje zeen hebbe gein slegte bedoelinge, want dur heet zich nog noeëts iets akeligs veur gedaon. Ut motte dus haost waal fieestspoeëke zeen, want eeder jaor keumptj dur minstes ein spoeëk zich tusse vastelaovundj-veerendj Swartbrook meenge.
Tradiessie getrauw wurtj laat op vastelaovundj-deensdig ut spoeëk gevange door de Prins en onger begeleiding vanne Boorekapel en alle Spoeëkejaegers, groeët en minder groeët trök ut spoeëkebos in gejaagdj.