Proklamatie van Jeugdprins Keano en Jeugdprinses Zoë 2025

 

Samen:       Wae, Jeugdprins Keano en Jeugdprinses Zoë, regeere bee-j de gratie van alle groeëte en klein wichter van Swartbrook

Keano:        Ich woeën op de Coolestraot naeve Eric vanne Smeed. Wae klikke waal mèt ein, want dae woeëndj ouch regelmaotig op Curacao en dao heet os mam ouch heur roots!

Zoë:             Ich woeën op de Rectorijstraot tegeneuver de speultuin en kan bee-j Kemper achterom kieke. Ich zeen eedere daag dét Gerard steeds later opsteit, want dae heet now unne robot!

Samen:       Doon uch wete det:

Keano:        Ich de knapste en aodste zoon bin van Frank van Harrie van Sissen Geel en Mia van Lei van Poel Door en van Chayenne van Karin van Annie en Piet van de Hollandsje aerpel en van Didley van Curaçao van de krom banane en groeëte kokosneut.  

Zoë:             Ich de knapste en jóngste dochter bin van Mark van Thieu van Harrie van Klomp en Leen van Slaats en Joyce van Harrie van Lieëne Toeën en Ans van Jan van Anneke van de Wal.

Keano:        Ich bin de groeëtste lummel in os gezin. Ich staek al bekans boven os Pap en Mam oet en bin bekans 2 köp groeëter dan mien zösterke Chenoa.

Zoë:             Ich heb 2 groeëte breurs Milan en Luca. Die hebbe echte Italiaanse name, mér wie-j ze zich motte gedrage als casanova’s, dao hebbe ze nog geine kieës van gegaete !

Keano:        Dan motte ze unne kieër mét mích kome kalle, want bee-j mich drei-je de maegdjes om mich haer alsof ut niks is. Mieër als mien credit card aankan!

Zoë:             Nouw, nouw, dich duis nogal oet de huûgdje. Zék, Keano, zeen ich dao un speer haor ônger dien naas?

Keano:        Nae, dét kan neet, ich heb mich vanmörge nog gesjoôre! Mien vèl is fijn glaad zônger al det gepongel van die vrolluuj! Ich staon der altieëd pico bello op .

Zoë:             Jao det kloptj. Ich verzörg mich zelf ouch gaer; ich doon aan skin care, doon gaer wat make-up op mien gezicht en bin gaer met mien haor aan ut frotte. Ich oefen altieëd op os Pap want dao kan ich toch niks aan verknalle!

Keano:        Ich help altiêt gaer in en roondj-om ut hoeës mét allerlei karweikes. Os mam zeet dék “Haaj ich mér zoeëne míns!”

Zoë:             Ich bin hèrstikke lenig want ich turn al jaore bee-j Jan van Wieërt. Dét heb ich van opa Harrie geërfdj; Dae zoot ouch altieëd in de gymzaal!

Keano:        Dét zeen ich ouch met basketbal. Wae zitten same in ut zelfdje team en geregeldj löps-se tösse mien bein door als ich effe neet oplet!

 

Zoë:             Jao, wae vrolluuj zeen now einmaol herstikke snel. Mèr, ich mot ieërluk zegge det ich ouch hieël snel weg bin as ich insecte zeen en veural motte!

Keano:        Wie kins ze now bang zeen veur motte, die doon toch niks? Ich mót thoeës van alles; de chihuahua’s, de rottweiler en de hamster verzörge, mér det doon ich gaer!

Zoë:             Ich haoj ouch van bieëste, ich wil gaer vieë-arts waere! Mér bieëste in laote slaope, det ving ich zielig!

Keano:        Dan mos-se stage gaon laupe beej ozze Vorst. Dae opereertj eedere daag hinne en kalkoene, mér ze weer inein zette, dét is lestig zeet der altiêd !

Zoë:             Sjei mich eweg, miene maag dreijt zich om! Dalik heb ich geine hônger mieër. Ich bin geine meujlikke aeter en löst knap van alles, mér wraps met zalm ving ich om de vinger beej aaf te lekke!

Keano:        Euver wraps gesproke, ich dink dét ut tiêd  weurtj det wae os beej-ein pakke en same aan dit jubileum seizoen gaon beginne!

Zoë:             Jao, ich bin der herstikke gruuëts op dét ich same met dich dit vastelaovundjseizoen veurop moog gaon

Keano:        Ich auch! Wae zeen al jaore un paar en trèkke gaer mét dein-anger op dus knalle wae der now in!  

Samen:       Wae hebbe de orde ingesteldj van “Ut springendj basketballerke” en det alles onger os devies:

 

“Mèt eine spróng en paâs, gaeve wae dit jubileumjaor vôl gaâs!”

ALAAF !